Kreu i Partisë Demokratike, Sali Berisha, deklaroi sot gjatë tryezës së rrumbullakët me temë “Riktheni të rinjtë shqiptarë përsëri në atdhe” se një nga vendimet e para të forcës politike që ai drejton, në rast se fiton zgjedhjet e 11 majit, do të jetë rikthimi i platformës TikTok në Shqipëri.

“Një prej vendimeve të para do të jetë hapja e TikTok, sepse mbyllja e kësaj platforme është një akt censure,” tha Berisha, duke akuzuar qeverinë për ndërhyrje në lirinë e shprehjes.

Ai e cilësoi vendimin për bllokimin e TikTok-ut si një veprim që bie ndesh me parimet demokratike dhe lirinë e të rinjve për t’u shprehur. “Vendimi i parë do të jetë hapja e Tik Tok sepse, duke goditur këtë platformë për qëllime censure të gjithë duhet ta dinë se, çdo diktaturë fillon me censurën” shtoi ai.

Berisha theksoi rëndësinë e angazhimit të të rinjve në politikë dhe u shpreh mirënjohës për kontributin e tyre në fushatë./atsh.al